🔴 بريد الجزائر أعلن رسميًا عن إطلاق أول بطاقة كلاسيكية مسبقة الدفع بالتعاون مع بنك الجزائر، وهذا كان على هامش معرض إفريقيا للتجارة البينية (IATF 2025). في البداية، البطاقات موجهة فقط للمشاركين والزوار في المعرض، لكن قريبًا راح تتعمم على كامل التراب الوطني.
الفكرة بسيطة: البطاقة المسبقة الدفع هي بطاقة تشحنها بالمال قبل ما تستعملها، ما تحتاج لا حساب بريدي ولا بنكي. تختار الباقة لي تناسبك: 5000 دج، 10000 دج، 25000 دج أو 50000 دج. بعد ما تشري البطاقة وتشحنها، تقدر تستعملها باش تدفع في المحلات أو عبر الإنترنت (إذا دعموها) أو حتى تسحب الدراهم من الموزعات إذا متاحة الخدمة.
لكن علاش أصلاً البطاقات المسبقة الدفع مهمة؟ عالميًا، ناس بزاف يستعملوها لعدة أسباب:
الناس لي ما عندهمش حساب بنكي يقدرو يستعملوها بسهولة.
أمان أكثر في الشراء عبر الإنترنت 🔐، تشحن مبلغ صغير وتشري به بلا ما تعرض حسابك البنكي للخطر.
تساعدك تتحكم في مصاريفك 💳، خاصة إذا عطيتها لولدك ولا حاب تجرب مواقع غير موثوقة.
في الخارج، الناس يستعملوها للسفر، الهدايا وحتى الاشتراكات العالمية.
الخدمة مازالت جديدة، والتفاصيل التقنية ما توضحتش كامل.
في رأيك، وش تشوف أهميتها في الجزائر و بالنسبة ليك ؟